Juohkán
Ellen Ravna
Dássi
Giella
Fáttát
Čoavddasánit
Divtta modelleren ja čállin
Ohppiide lea vuogas čájehit mo sáhttá čállit divtta. Geardduheami lea álki geavahit váikkuhangaskaoapmin go ieža galget čállit.
Oahpaheaddji čájeha ohppiide divtta, omd. Mu jahki, geahča mildosa. Ovttas lohket divtta jitnosit, háleštit sisdoalus ja mo lea olggosoaidnit. Dasto gávdnet sániid ja cealkagiid, mat geardduhuvvojit. Sáhttet maiddái háleštit das, maid oahppit liikojit bargat dálvet, geasset jna. Sániid, mat dalle ihtet, heive čállit jurddakártan távvalii.
Dál galget oahppit čállit iežaset miela mielde divtta. Sii leat modelleremis ožžon ovdamearkka ja távvalis sáhttet geahččat jurddakártta sániid. Muhtumiidda sáhttá leat álkit, jos oahpaheaddji dál sihkku oasi eret divttas, maid lea čájehan, omd. ná:
Dálvet mun čuoiggan
Mun liikon čuoigat
Mun liikon dálvái
Loi lo go lo!
Giđđat mun_____
Mun liikon______
Mun liikon______
Loi lo go lo!
Geasset mun______
Mun liikon_______
Mun liikon______
Loi lo go lo!
Čakčat mun______
Mun__________
Mun__________
Loi lo go lo!
Oahpaheaddji johtá ohppiid mielde ja rávve dárbbuid mielde. Go oahppit leat geargan čállimis ja ovttas oahpaheddjiin leat árvvoštallan divttaset, de juohkehaš čiŋaha divttas nu ahte šaddá čábbát olggosoaidnit. Dasto heŋgejuvvojit buot divttat seaidnái oidnosii.
Oahpaheaddji ja oahppit sáhttet maiddái háleštit das, mo galgá lohkat divtta jitnosit, ja dasto hárjehallat lohkat. Loahpas ovdanbuktet oahppit luohká ovddas, dahje juohkehaš ráhkada unna divttalohkanfilmmaža, maid maŋŋá čájeha earáide.
"Mu jahki"-diktii (mielddusin) sáhttá logadettiin dahkaluddat ahte čuoigá, dánsu jna.
Ellen Ravna, Sirpmá skuvla, Deanu gielda, 2017