Čállinskovit

Čállinskovit leat jurddašuvvon veahkkin ohppiide go galget logadettiin čállit ja oahppat fágateavsttaid guorahallat.

Čállinskovit

Oahppit máhttet ja dihtet ollu, muhto čájehit ja duođaštit máhtu ii leat álo álki. Čállit lea eambbo go oahppat čállit riekta ja rivttes čállinnjuolggadusaid máhttit geavahit. Čállinskovit galget veahkehit oahppi čálligoahtit oahppama dihte, ja hálddašit ja earuhit iešguđet šáŋŋeriid. Oahppi oahppá máhtustis čájehit čállima bokte go systemáhtalaččat geavaha čállinskoviid.

Lea datte dehálaš ahte čállinhárjáneapmi ii báze dan duohkai ahte dušše skoviid deavdilit. Čállinskovit leat jurddašuvvon álgoveahkkin ja doarjagiin ohppiide geat rahčet čállimin. Oahpaheaddji berre máŋgii modelleret ohppiide skoviid. Dasto sáhttet oahppit ieža deavdit/čállit skoviide ja loahpas čállit skoviid haga.

Čállinskoviid sáhttá geavahit buot fágaid ja fáttáid olis. Oahpaheaddjit sáhttet friddja redigeret skoviid nu mo heive sidjiide. Skovit ja ovdamearkkat dain leat jurddašuvvon dušše ovdamearkan.

Čállinskoviid leat viežžan: Skrivesenteret. Nasjonalt senter for skriveopplæring og skriveforsking.