Saemien skuvle-vaajese 3

Daate Saemien skuvle-vaajese-raajroen gåalmede gærja.

Gærjah edtjieh smaave vuesiehtimmetjh saemien skuvleaarkebiejjijste vuesiehtidh, guktie learohkh, lohkehtæjjah, internaathbarkijh jïh eejhtegh dejtie dåårjehtalleme. Daesnie aaj tjaaleldahkh jïh artihkelh mah vuesiehtieh dovne konsekveensh staaten skuvlepolitihkeste jïh gæmhpomem evtiedidh skuvle gusnie saemien gïele jïh kultuvre våaroeminie. Daennie gærjesne gellie artihkelh saemien maanagïertijste Unjárgeste Oslovasse, mejnie noerhte-, julev-, åarjelsaemien jallh daaroengïele åejviegïeline. Dle libie vïjhte voenide jallh tjïeltide goerehtamme: Máze (Masi), Davvesiida (Lebesby), Fálesnuorri (Kvalsund), Ákŋoluokta (Hasvik) jïh Loabát (Lavangen). Dåeriedibie skuvle-evtiedimmiem daejnie tjïeltine ovmese faasi tjïrrh: misjovne, daaroedehteme jïh minngemosth saemiengïele ööhpehtimmiegïeline jallh mubpien gïeline skuvlesne.